Għaliex qed nagħmlu Manifest Elettorali?

Bl-involviment sħiħ tar-residenti u f’kollaborazzjoni mal-Awtoritajiet kompetenti jinħoloq network ta’ toroq imħaddra li jwasslu minn u lejn inħawi differenti ta’ Birżebbuġa, spazji miftuħa u l-ambjenti naturali, kemm widien kif ukoll xtajtiet, li jdawru u jsebbħu r-raħal tagħna, permezz ta’ proġetti żgħar ta’ tħaddir f’toroq u rkejjen differenti ta’ Birżebbuġa u tisbieħ u ħolqien ta’ spazji miftuħa.

Dan għandu jwassalna sabiex Birżebbuġa u l-istorja millenarja tagħha jkunu dejjem iktar integrati u impoġġija fuq quddiem fil-prodott turistiku Malti.

Nagħmlu pressjoni fuq l-awtoritajiet u naraw li l-proċess biex il-playing field ta’ ħdejn l-iskola primarja jiġi rranġat u jingħata lura lir-residenti. Bħala parti mill-proġett Inħaddru Raħalna: The Green Trail, il-Kunsill Lokali għandu joħloq playing field f’din l-erja u ġnien li jlaqqa’ residenti ta’ kull età fejn jilagħbu, jistrieħu u jitkellmu.

Wara li ġie mmodernizzat il-playing field tal-Bajja s-Sabiħa, l-apparat installat ma jolqotx l-etajiet u l-abbiltajiet kollha; dan l-ispazju għandu jitkabbar u jiġi installat b’apparat li jippromwovi l-iżvilupp sħiħ tat-tfal, inkluż l-inklużjoni. 

Dan il-ġnien għandu jkun ħolqa oħra fin-network Inħaddru Raħalna: The Green Trail fejn għandu jsir proġett biex dan is-sit f’post hekk sabiħ jiġi rranġat b’mod li jikkumplimenta s-siti storiċi u l-arkitettura unika biswitu u jkun post ta’ mistrieħ anke għal dawk li jkunu qed iterrqu matul il-Green Trail.

B’involviment sħiħ tar-residenti, tan-negozji u tal-intrapriżi, bil-kollaborazzjoni mal-entitajiet responsabbli, u permezz ta’ fondi Ewropej inniedu sistema fejn wara li jiġu ssetjati numru ta’ miri ambjentali bħal fil-ħoss, tniġġiż fl-arja u fil-baħar, konservazzjoni tal-ilma, fit-traffiku u fl-iżvilupp sostenibbli, u permezz ta’ teknologija moderna, jittieħed il-kejl sabiex jittieħdu l-azzjonijiet kemm fil-ħajja tagħna ta’ kuljum kif ukoll fit-tul biex Birżebbuġa tkun il-lokalità fuq quddiem nett fil-miri ambjentali. 

Sabiex ninkoraġixxu li l-anzjani jibqgħu jgħixu fil-kommunità, naħdmu biex jinstab sit u jinbeda proġett mal-awtoritajiet konċernati biex isir night shelter f’Birżebbuġa. Dan iċ-ċentru għandu jservi ukoll bħala ċentru miftuħ għall-anzjani għal matul il-ġurnata. 

Wara li nassiguraw illi fil-klinika l-ġdida jiġu offruti s-servizzi bażiċi, naraw illi dawn is-servizzi jiġu estiżi sabiex jinkludu ukoll programmi ta' edukazzjoni u prevenzjoni fil-kura personali u fis-saħħa fiżika u mentali.

L-entraturi prinċipali tal-lokalità għandhom jiġu mtejba wara studju u disinn sabiex dawn ikunu aktar effiċjenti u siguri. 

Dan jinkludi l-ħruġ minn Triq tal-Papa għat-triq li tagħtigħal Freeport fejn rajna numru ta' inċidenti fl-aħħar snin.

Sabiex tittaffa’ l-problema ta’ parkeġġ li dejjem tikber fil-lokalità tagħna, speċjalment fis-sajf, apparti s-sit deżinjat fil-parkeġġ il-ġdid, għandu jinħoloq parkeġġ ġdid bħala parti minn kwalukwe proġett fl-eks-impjant tal-gass deżinjat għall-karozzi fis-sajf.

Ukoll, l-ewwel erba’ postijiet ta’ parkeġġ ta’ kull triq li twassal lejn il-baħar, għandhom ikunu deżinjata għar-residenti ta’ Birżebbuġa. 

Hawn bżonn ta’ numru ta’ bus shelters l-aktar fil-Qajjenza u Tal-Papa. Dawn il-bus shelters għandhom jikkumplimentaw il-bidla meħtieġa fir-rotot u fil-frekwenza tas-servizz pubbliku. Dan kollu għandu jsir wara konsultazzjoni sħiħa mar-residenti tal-inħawi. 

Inkunu vuċi għar-residenti u ssir kull pressjoni possibli sabiex kull fejn hemm art pubblika, inklużi l-eks-impjant tal-gass u l-installazzjoni tal-31 ta’ Marzu jiġu integrati mal-proġett Inħaddru Raħalna: The Green Trail u li l-iżvilupp fihom ikun limitat biss għal dan il-għan u għanijiet soċjali u ċiviċi u bl-ebda mod ma jiġu kummerċjalizzati.

Sabiex titjieb il-governanza u jiżdiedu t-trasparenza u l-akkontabilità, il-Kunsill Lokali jrid jara illi r-residenti ikunu mhux biss ikkonsultati u infurmati kontinwament u bil-mezzi kollha li jilħquhom imma wkoll involuti b’mod sħiħ fid-deċiżjonijiet li jolqtu lilhom. Dan irid isir b’mezzi differenti li jilħqu nies differenti u li tiġi ppjanata skeda ta’ konsultazzjoni skont il-kwistjonijiet li jkunu qed jiġu indirizzati. 

Nibdew proċess biex numru ta’ servizzi offruti mill-Kunsill Lokali bħal ma huma rapporti ta’ qtugħ ta’ bozoz tat-toroq u bulky refuse jitħaddmu mill-mobile. 

Niżguraw li kull parti tal-lokalità  tagħna jkollha rappreżentanza ġusta fil-ħidma tal-Kunsill biex b’hekk naraw li kull żona jkollha leħen fid-deċiżjonijiet u li l-Kunsill jagħraf il-problemi ta’ dawn l-inħawi kollha. 

Ngħinu lill-għaqdiet kollha ta’ Birżebbuġa billi niżguraw li jkollhom aċċess għal pool ta’ professjonisti li joffru kull għajnuna li l-organizzazzjonijiet volontarji jista’ jkollhom bżonn biex iwettqu l-għanijiet tagħhom, inkluż f’applikazzjonijiet ta’ skemi u għal fondi Ewropej. 

Naħdmu ma’ għaqdiet sportivi lokali biex titwaqqaf skola sportiva għat-tfal ta’ Birżebbuġa għal żmien is-sajf bejn l-għaqdiet sportivi ta’ Birżebbuġa kkoordinata mill-Kunsill Lokali b’mod li tagħti togħma ta’ sport differenti li t-tfal jistgħu jipprattikaw ġewwa Birżebbuġa stess.